July 15, 2025

Daily Gianwan Bureau / National

 ਹੈਦਰਾਬਾਦ ਦੇ ਨਾਮਪੱਲੀ ਵਿੱਚ ਕੁਝ ਬੱਚੇ ਕ੍ਰਿਕਟ ਖੇਡ ਰਹੇ ਸਨ। ਖੇਡਦੇ ਸਮੇਂ ਉਨ੍ਹਾਂ ਦੀ ਗੇਂਦ ਅਚਾਨਕ ਸਾਹਮਣੇ ਵਾਲੇ ਘਰ ਵਿੱਚ ਚਲੀ ਗਈ। ਘਰ ਕਈ ਸਾਲਾਂ ਤੋਂ ਬੰਦ ਸੀ। ਬਾਹਰੋਂ ਇਹ ਘਰ ਕਿਸੇ ਖੰਡਰ ਤੋਂ ਘੱਟ ਨਹੀਂ ਲੱਗ ਰਿਹਾ ਸੀ। ਜਦੋਂ ਬੱਚੇ ਆਪਣੀ ਗੇਂਦ ਲੈਣ ਲਈ ਘਰ ਵਿੱਚ ਦਾਖਲ ਹੋਏ ਤਾਂ ਸਾਰੇ ਹੈਰਾਨ ਰਹਿ ਗਏ। ਇਸ ਘਰ ਵਿੱਚ ਇੱਕ ਪਿੰਜਰ ਪਿਆ ਸੀ। ਪਿੰਜਰ ਬੁਰੀ ਤਰ੍ਹਾਂ ਸੜਿਆ ਹੋਇਆ ਸੀ ਤੇ ਹੱਡੀਆਂ ਦਾ ਸਿਰਫ਼ ਇੱਕ ਹਿੱਸਾ ਹੀ ਦਿਖਾਈ ਦੇ ਰਿਹਾ ਸੀ। ਪਿੰਜਰ ਦੇ ਆਲੇ-ਦੁਆਲੇ ਬਹੁਤ ਸਾਰੇ ਭਾਂਡੇ ਖਿੰਡੇ ਹੋਏ ਸਨ, ਜਿਸ ਤੋਂ ਪਤਾ ਲੱਗਦਾ ਸੀ ਕਿ ਇਹ ਸ਼ਾਇਦ ਰਸੋਈ ਸੀ। ਜਦੋਂ ਆਲੇ-ਦੁਆਲੇ ਦੇ ਲੋਕਾਂ ਨੂੰ ਇਸ ਬਾਰੇ ਪਤਾ ਲੱਗਾ ਤਾਂ ਉਨ੍ਹਾਂ ਨੇ ਪੁਲਿਸ ਨੂੰ ਸੂਚਿਤ ਕੀਤਾ। ਜਦੋਂ ਪੁਲਿਸ ਮੌਕੇ 'ਤੇ ਪਹੁੰਚੀ ਤੇ ਜਾਂਚ ਸ਼ੁਰੂ ਕੀਤੀ ਤਾਂ ਇੱਕ ਤੋਂ ਬਾਅਦ ਇੱਕ ਹੈਰਾਨ ਕਰਨ ਵਾਲੇ ਸਬੂਤ ਨਿਕਲਣੇ ਸ਼ੁਰੂ ਹੋ ਗਏ। ਮਾਮਲੇ ਦੀ ਜਾਣਕਾਰੀ ਦਿੰਦੇ ਹੋਏ ਪੁਲਿਸ ਨੇ ਕਿਹਾ ਕਿ ਪਿੰਜਰ ਆਮਿਰ ਖਾਨ ਨਾਮ ਦੇ ਇੱਕ ਬਜ਼ੁਰਗ ਵਿਅਕਤੀ ਦਾ ਸੀ, ਜਿਸ ਦੀ ਉਮਰ ਲਗਪਗ 50 ਸਾਲ ਹੋ ਸਕਦੀ ਹੈ।

ਪੁਲਿਸ ਨੂੰ ਪਿੰਜਰ ਦੇ ਨੇੜੇ ਇੱਕ ਪੁਰਾਣਾ ਨੋਕੀਆ ਫੋਨ ਵੀ ਮਿਲਿਆ ਹੈ। ਇਸ ਤੋਂ ਇਲਾਵਾ ਕੁਝ ਪੁਰਾਣੇ ਨੋਟ ਵੀ ਆਲੇ-ਦੁਆਲੇ ਪਏ ਸਨ, ਜਿਨ੍ਹਾਂ 'ਤੇ ਨੋਟਬੰਦੀ ਤੋਂ ਬਾਅਦ ਪਾਬੰਦੀ ਲਗਾ ਦਿੱਤੀ ਗਈ ਸੀ। ਪੁਰਾਣੇ ਨੋਟਾਂ ਨੂੰ ਦੇਖ ਕੇ ਪੁਲਿਸ ਨੂੰ ਸ਼ੱਕ ਹੋਇਆ ਕਿ ਇਹ ਪਿੰਜਰ ਲਗਪਗ 10 ਸਾਲ ਪੁਰਾਣਾ ਹੋ ਸਕਦਾ ਹੈ ਕਿਉਂਕਿ ਨੋਟਬੰਦੀ 2016 ਵਿੱਚ ਹੋਈ ਸੀ ਤੇ ਘਰ ਵਿੱਚ ਮਿਲੇ ਨੋਟ ਇਸ ਤੋਂ ਵੀ ਪੁਰਾਣੇ ਹਨ। ਪੁਲਿਸ ਜਾਂਚ ਵਿੱਚ ਪਤਾ ਲੱਗਾ ਕਿ ਇਹ ਘਰ ਜੋ ਕਈ ਸਾਲਾਂ ਤੋਂ ਬੰਦ ਸੀ, ਮੁਨੀਰ ਖਾਨ ਦਾ ਸੀ। ਮੁਨੀਰ ਦੇ 10 ਬੱਚੇ ਸਨ ਤੇ ਆਮਿਰ ਉਸ ਦਾ ਤੀਜਾ ਪੁੱਤਰ ਸੀ। ਆਮਿਰ ਇਸ ਘਰ ਵਿੱਚ ਇਕੱਲਾ ਰਹਿੰਦਾ ਸੀ ਤੇ ਉਸ ਦੇ ਹੋਰ ਭੈਣ-ਭਰਾ ਕਿਤੇ ਦੂਰ ਰਹਿੰਦੇ ਹਨ। ਏਸੀਪੀ ਕਿਸ਼ਨ ਕੁਮਾਰ ਨੇ ਐਨਡੀਟੀਵੀ ਨਾਲ ਗੱਲਬਾਤ ਵਿੱਚ ਕਿਹਾ- ਆਮਿਰ ਦੇ ਪਿੰਜਰ ਦੇ ਕੋਲ ਮਿਲੇ ਨੋਕੀਆ ਫੋਨ ਦੀ ਬੈਟਰੀ ਖ਼ਤਮ ਹੋ ਗਈ ਸੀ। ਜਦੋਂ ਫੋਨ ਚਾਰਜ ਕਰਨ ਤੋਂ ਬਾਅਦ ਚਾਲੂ ਕੀਤਾ ਗਿਆ ਤਾਂ ਦੇਖਿਆ ਗਿਆ ਕਿ ਫੋਨ ਵਿੱਚ 84 ਮਿਸਡ ਕਾਲਾਂ ਸਨ, ਜੋ ਕਿ 2015 ਦੀਆਂ ਸਨ। ਅਜਿਹੀ ਸਥਿਤੀ ਵਿੱਚ ਇਹ ਸੰਭਵ ਹੈ ਕਿ ਆਮਿਰ ਦੀ ਮੌਤ 2015 ਵਿੱਚ ਹੋਈ ਹੋਵੇਗੀ।

Powered by Froala Editor

10 Year Old Skeleton Found In Hyderabad House That Was Closed For Many Years