April 30, 2024
Daily Gianwan Bureau / Machhiwara
ਮਾਛੀਵਾੜਾ ਸਾਹਿਬ ਵਿਖੇ ਇੱਕ ਨਾਮੀ ਫਾਸਟ ਫੂਡ ਦੀ ਦੁਕਾਨ ਤੇ ਗਾਹਕ ਨੂੰ ਸਪਲਾਈ ਕੀਤੇ ਪੀਜ਼ੇ ਵਿਚੋਂ ਕਾਕਰੋਚ ਨਿਕਲਣ ਤੇ ਹੰਗਾਮਾ ਹੋ ਗਿਆ। ਇਹ ਪੀਜ਼ਾ ਮੰਗਵਾਉਣ ਵਾਲੇ ਰਤੀਪੁਰ ਨਿਵਾਸੀ ਹਰਦੀਪ ਸਿੰਘ ਨਾਗਰਾ ਨੇ ਦੱਸਿਆ ਕਿ ਉਸਨੇ ਅੱਜ ਇਸ ਫਾਸਟ ਫੂਡ ਦੀ ਦੁਕਾਨ ਤੋਂ ਇੱਕ ਪੀਜ਼ਾ ਅਤੇ ਗਾਰਲਿਕ ਬਰੈਡ ਦਾ ਬਰੈਡ ਦਾ ਆਰਡਰ ਦਿੱਤਾ ਸੀ ਤੇ ਇਸਨੂੰ ਡਲਿਵਰੀ ਕਰਨ ਵਾਲਾ ਲਡ਼ਕਾ ਕਰੀਬ 3 ਵਜੇ ਘਰ ਉਸਨੂੰ ਇਹ ਸਮਾਨ ਦੇ ਗਿਆ। ਹਰਦੀਪ ਸਿੰਘ ਨਾਗਰਾ ਨੇ ਦੱਸਿਆ ਇਹ ਪੀਜ਼ਾ ਖੋਲ ਕੇ ਇਸਨੂੰ ਖਾਣਾ ਸ਼ੁਰੂ ਕੀਤਾ ਤਾਂ ਉਸਨੇ ਦੇਖਿਆ ਕਿ ਉਸ ਵਿਚ ਇੱਕ ਥਾਂ ਤੇ ਮਰਿਆ ਹੋਇਆ ਕਾਕਰੋਚ ਚਿਪਕਿਆ ਪਿਆ ਸੀ। ਉਸਨੇ ਇਹ ਸਾਰਾ ਖਾਣਾ ਤੁਰੰਤ ਬੰਦ ਕਰ ਦਿੱਤਾ।
ਇਹ ਮਰੇ ਹੋਏ ਕਾਕਰੋਚ ਵਾਲਾ ਪੀਜ਼ਾ ਲੈ ਕੇ ਉਹ ਫਾਸਟ ਫੂਡ ਵਾਲ ਦੁਕਾਨ ਤੇ ਗਿਆ ਤਾਂ ਅੱਗੋਂ ਕੰਮ ਕਰਨ ਵਾਲੇ ਲਡ਼ਕਿਆਂ ਨੇ ਕਿਹਾ ਕਿ ਸਾਡੀ ਕੋਈ ਗਲਤੀ ਨਹੀਂ ਹੈ ਇਹ ਕਾਕਰੋਚ ਪਤਾ ਨਹੀਂ ਕਿੱਥੋਂ ਆ ਗਿਆ। ਹਰਦੀਪ ਸਿੰਘ ਨਾਗਰਾ ਨੇ ਕਿਹਾ ਕਿ ਜੇਕਰ ਇਹ ਮਰਿਆ ਹੋਇਆ ਕਾਕਰੋਚ ਵਾਲਾ ਪੀਜ਼ਾ ਮੇਰੇ ਬੱਚੇ ਖਾ ਲੈਂਦੇ ਤਾਂ ਉਨ੍ਹਾਂ ਨੇ ਬਿਮਾਰ ਹੋ ਜਾਣਾ ਸੀ। ਹਰਦੀਪ ਸਿੰਘ ਨੇ ਕਿਹਾ ਕਿ ਉਸਨੇ ਸਿਹਤ ਵਿਭਾਗ ਨੂੰ ਇਸ ਸਬੰਧੀ ਲਿਖਤੀ ਸ਼ਿਕਾਇਤ ਕਰੇਗਾ ਤਾਂ ਜੋ ਇਹ ਗੰਦਾ ਖਾਣਾ ਸਪਲਾਈ ਕਰਨ ਵਾਲੇ ਫਾਸਟ ਫੂਡ ਦੁਕਾਨਦਾਰ ਖਿਲਾਫ਼ ਸਖ਼ਤ ਕਾਰਵਾਈ ਹੋਵੇ ਤਾਂ ਜੋ ਅੱਗੇ ਤੋਂ ਹੋਰ ਦੁਕਾਨਦਾਰ ਵੀ ਚੁਕੰਨੇ ਹੋ ਕੇ ਸਾਫ਼ ਸੁਥਰਾ ਖਾਣਾ ਸਪਲਾਈ ਕਰਨ।
ਜਦੋਂ ਇਸ ਸਬੰਧੀ ਮੋਬਾਇਲ ਫੋਨ ਤੇ ਫਾਸਟ ਫੂਡ ਦੀ ਦੁਕਾਨ ਚਲਾਉਣ ਵਾਲੇ ਮੈਨੇਜਰ ਨਾਲ ਗੱਲ ਕੀਤੀ ਗਈ ਤਾਂ ਉਨ੍ਹਾਂ ਕਿਹਾ ਕਿ ਖਾਣਾ ਬਣਾਉਣ ਵੇਲੇ ਪੂਰੀ ਸਫਾਈ ਰੱਖੀ ਜਾਂਦੀ ਹੈ ਤੇ ਅਜਿਹੀ ਕੁਤਾਹੀ ਕਦੇ ਨਹੀਂ ਹੋ ਸਕਦੀ। ਉਨ੍ਹਾਂ ਕਿਹਾ ਕਿ ਪੀਜ਼ਾ 400 ਡਿਗਰੀ ਤਾਪਮਾਨ ਤੇ ਤਿਆਰ ਕੀਤਾ ਜਾਂਦਾ ਹੈ ਤੇ ਇਸ ਵਿਚ ਜੇ ਕਾਕਰੋਚ ਹੁੰਦਾ ਤਾਂ ਉਹ ਪੂਰੀ ਤਰ੍ਹਾਂ ਸਡ਼ ਜਾਣਾ ਸੀ। ਪੀਜ਼ਾ ਵਿੱਚੋਂ ਕਾਕਰੋਚ ਨਿਕਲਣ ਦੀ ਘਟਨਾ ਤੋਂ ਬਾਅਦ ਲੋਕਾਂ ਨੂੰ ਇਹ ਫਾਸਟ ਫੂਡ ਦਾ ਸਮਾਨ ਧਿਆਨ ਨਾਲ ਖਾਣਾ ਪਵੇਗਾ ਤੇ ਸਿਹਤ ਵਿਭਾਗ ਨੂੰ ਵੀ ਇਸਦੀ ਜਾਂਚ ਕਰਨੀ ਪਵੇਗੀ ਕਿ ਗਲਤੀ ਕਿੱਥੇ ਹੋਈ ਹੈ।
Dead Cockroach Pizza Famous Fast Food Shop Machiwara
