September 30, 2024
Daily Gianwan Bureau / Ludhiana
ਸਥਾਨਕ ਪੁਲਿਸ ਵਿਭਾਗ ਵਿਚ ਤਇਨਾਤ ਡੀਐਸਪੀ ਦੇ ਘਰੋਂ ਲੱਖਾਂ ਰੁਪਏ ਦੇ ਸੋਨੇ ਅਤੇ ਹੀਰਿਆਂ ਦੇ ਗਹਿਣੇ ਚੋਰੀ ਕਰਨ ਵਾਲੀਆਂ ਦੋ ਪ੍ਰਵਾਸੀ ਔਰਤਾਂ ਨੂੰ ਬਿਹਾਰ ਤੋਂ ਗ੍ਰਿਫ਼ਤਾਰ ਕਰ ਲਿਆ ਹੈ। ਦੱਸਣਾ ਬਣਦਾ ਹੈ ਕਿ ਲੰਘੀ 18 ਸਤੰਬਰ ਨੂੰ ਦੋ ਔਰਤਾਂ ਨੇ ਡੀਐਸਪੀ ਦੇ ਘਰੋਂ 23 ਲੱਖ ਰੁਪਏ ਦੇ ਸੋਨੇ ਅਤੇ ਹੀਰਿਆਂ ਦੇ ਗਹਿਣੇ ਚੋਰੀ ਕਰ ਲਏ ਸਨ। ਥਾਣਾ ਸਿਵਲ ਲਾਈਨ ਦੀ ਪੁਲਿਸ ਨੇ ਡੀਐਸਪੀ ਦੀ ਪਤਨੀ ਤਰਨਜੀਤ ਕੌਰ ਦੀ ਸ਼ਿਕਾਇਤ ’ਤੇ ਅਣਪਛਾਤੀਆਂ ਔਰਤਾਂ ਖਿਲਾਫ ਕੇਸ ਦਰਜ ਕੀਤਾ ਸੀ। ਇਸ ਸਬੰਧੀ ਸਥਾਨਕ ਸੈਕਟਰੀਏਟ ਵਿਚ ਕੀਤੀ ਗਈ ਪ੍ਰੈਸ ਵਾਰਤਾ ਦੌਰਾਨ ਪੁਲਿਸ ਕਪਤਾਨ ਅਮਨੀਤ ਕੌਂਡਲ ਨੇ ਦੱਸਿਆ ਹੈ ਕਿ ਡੀਐਸਪੀ ਦੀ ਪਤਨੀ ਵੱਲੋਂ ਸ਼ਿਕਾਇਤ ਦਰਜ ਕਰਵਾਈ ਗਈ ਸੀ ਕਿ ਦੋ ਔਰਤਾਂ ਉਸ ਕੋਲੋਂ ਕੰਮ ਮੰਗਣ ਆਈਆਂ ਸੀ।
ਉਕਤ ਔਰਤਾਂ ਨਾਲ ਘਰ ਦੀ ਸਾਫ ਸਫਾਈ ਦੇ ਕੰਮ ਸਬੰਧੀ ਗੱਲਬਾਤ ਹੋਈ ਸੀ। ਪੀੜਤਾ ਨੇ ਸ਼ਿਕਾਇਤ ਵਿਚ ਦੱਸਿਆ ਸੀ ਕਿ 18 ਸਤੰਬਰ ਨੂੰ ਉਹ ਪਹਿਲੇ ਦਿਨ ਘਰ ਦਾ ਕੰਮ ਕਰਨ ਆਈਆਂ ਸਨ, ਪਰ ਅਗਲੇ ਦਿਨ ਉਹ ਕੰਮ ’ਤੇ ਨਹੀਂ ਆਈਆਂ। ਇਸ ਦੌਰਾਨ ਜਦ ਉਸ ਨੇ ਘਰ ਦੀ ਅਲਮਾਰੀ ਦੇਖੀ ਤਾ ਉਸ ਵਿਚ ਰੱਖੇ ਗਹਿਣੇ ਗਾਇਬ ਸਨ। ਜਿਨ੍ਹਾਂ ਦੀ ਕੀਮਤ 23 ਲੱਖ ਰੁਪਏ ਦੇ ਕਰੀਬ ਬਣਦੀ ਸੀ।ਸੀਸੀਟੀਵੀ ਫੁਟੇਜ ਦੇ ਆਧਾਰ ’ਤੇ ਪੁਲਿਸ ਨੇ ਉਕਤ ਔਰਤਾਂ ਦੀ ਪਛਾਣ ਕਰ ਲਈ, ਜਿਸ ਤੋਂ ਬਾਅਦ ਕਥਿਤ ਦੋਸ਼ਣ ਬੰਟੀ ਕੁਮਾਰੀ, ਰੂਬੀ ਦੇਵੀ ਵਾਸੀ ਲਖਨਊ ਹਾਲ ਆਬਾਦ ਵਾਰਡ ਨੰਬਰ 17 ਸ਼ਿਵ ਕੁਮਾਰੀ ਪਹਾੜ ਜ਼ਿਲ੍ਹਾ ਭਾਗਲਪੁਰ ਬਿਹਾਰ ਨੂੰ ਭਾਗਲਪੁਰ ਦੇ ਕਹਿਲਗਾਉਂ ਤੋਂ ਗ੍ਰਿਫਤਾਰ ਕੀਤਾ ਗਿਆ ਹੈ।
Powered by Froala Editor
Theft Of Jewelery Worth Lakhs Of Rupees From DSP s House The Accused s Sisters Were Arrested From Bihar
